Sa bhliain 1928 d’fhógair an Gúm nuabhunaithe comórtas i gcomhair úrscéil. Theastaigh uathu scríbhneoirí a spreagadh chun litríocht chruthaitheach nua-aoiseach a chur ar fáil. Tar éis na lámhscríbhinní a mheas roinneadh an duais idir Lucht Ceoil le Barra Ó Caochlaigh agus Pádhraic Mháire Bhán le Seán Ó Ruadháin.

Is é saol na tuaithe i gCo. Mhaigh Eo sa tréimhse chorrach i ndeireadh na haoise seo caite agus i dtús na haoise seo, anuas go dtí Cogadh na Saoirse, príomhthéama Pádhraic Mháire Bhán. Gaiscíoch óg meabhrach é Pádhraic a chaitheann a shaol ag coimhlint ar son a mhuintire agus a thíre.