Úrscéal nuálach suntasach é seo, nach ndéanfar dearmad air go luath. Insíonn sé scéal Aislinge, déagóir a éiríonn ón uaigh ar Oíche Shamhna tar éis di a bheith marbh ar feadh beagnach céad bliain. Ní thuigeann sí ar dtús cén fáth a bhfuil sí tagtha ar ais, nó cad iad go díreach na cumhachtaí speisialta atá aici, ach buaileann sí le daoine a chabhraíonn léi dul i dtaithí ar shaol comhaimseartha na hÉireann agus a mhíníonn di cén fáth a bhfuil a cuid cumhachtaí ag teastáil anois. Tá mac léinn ar iarraidh agus seans go mbeidh Aisling in ann teacht air. Cé go bhfuil an scéal suite i gCill Mhantáin agus i mBaile Átha Cliath na laethanta seo, úsáideann sé seanbhéaloideas Gaelach faoin Lucht Sí go han-éifeachtach chun atmaisféar dorcha, mistéireach, draíochtúil a chruthú. Tá an-tóir ar scéalta faoi dhraíocht agus faoin osnádúr i litríocht Bhéarla na n-óg le blianta beaga anuas, agus taitneoidh an leabhar seo le léitheoirí ar mhaith leo an seánra seo agus ar féidir leo cealú an díchreidimh a dhéanamh.